Eugenio

Eugenio enllenaba escenarios cola so presencia y el so particular sentíu del humor. Siempre impasible, vistíu de prietu, escondíu tres unes gafes escures grandes y el fumu del so pitu eternu, dexó una buelga mui importante a delles xeneraciones qu'entovía se ríen y espliquen los sos chistes. De magar los años ochenta, hasta mediaos de los noventa, tuvo presente en tolos llares del Estáu al traviés de la televisión y fixo xires per toda España y parte de Llatinoamérica. Pero l'ésitu profesional escondía lo que pasaba lloñe de los focos, na intimidá.

Personaxe polifacéticu, Eugenio tamién foi xoyeru, cantante, empresariu, pintor, actor y inclusive aficionáu al esoterismu. La so vida tuvo marcada por un gran amor –la so primer esposa, Conchita Alcaide– que lu convirtió n'artista. La muerte prematura de Conchita foi'l punto d'inflexón que marcaría la so vida pa siempre. Per un llau, coincidió col aniciu del so ésitu; pel otru, apoderóse d'él una tristura infinita que lu llevaría a un pozu d'escuridá. Esti documental de Jordi Rovira y Xavier Baig trátase d'un retratu del Eugenio más desconocíu.

Rovira fai la función de direutor y guionista. Periodista autónomu dende'l 1998, ye llicenciáu en Ciencies de la Información (UAB), Ciencies Polítiques y Socioloxía (UAB), y Xeografía y Historia (UNED). Fixo reportaxes de caráuter social nuna trentena d'estaos como Kosovo, Irak, Sierra Lleona o Irlanda del Norte, espublizaos en munchos diarios españoles. Dende'l 2005 combina esti trabayu cola direición de 'Capçalera', la revista del Col·legi de Periodistes de Catalunya. Nel 2015, xunto con Òscar Moreno, codirixó'l documental 'Joana Biarnés, una entre todos'.

Baig ye direutor de fotografía y productor. Nel 2007 funda, xunto con Òscar Moreno, la productora Rec Videoproduccions SCP, dende la que producen y realicen documentales propios y por encargo pa cadenas como TVE, TV3, Antena 3 y Discovery Channel, y ente los que tamién destaca el dedicáu a Biarnés.