'Garráime que lu mato o la loca historia de Asturias', d'Escenapache

Una repás polos acontecimientos y personaxes más destacaos de la nuesa historia; eso sí, trataos dende l'humor. La trama de 'Garráime que lu mato o la loca historia de Asturias' desarróllase en distintes escenes y cuadros, pertenecientes, caún d'ellos, a una dómina en concretu.

Entama na prehistoria, col famosu 'homo prexubilatus', antecedente remotu de los asturianos. Pasa al Castru Cuaña, onde atopamos cola familia del famosu rebelde ástur Corocota, nel momentu de la llegada de los romanos a Asturies, con Publio Carisio al mandu de les sos tropes. Dientro del medievu, traten la invasión de los godos, la batalla de Cuadonga, la monarquía asturiana y el desembarcu de Carlos V.

Capítulu aparte merez la figura de Gaspar Melchor de Xovellanos. Lleguen les Guerres Carlistes. Conocemos a Marilse, dueña y rexente d'un chigre na zona de Morcín y verdadera inventora de los famosos Garbanzos del Desarme. La Revolución del 34, La Guerra Civil –escena inspirada nun fechu real desenvueltu mientres la Batalla d'El Mazucu–, y la dómina de La Transición, completen los acontecimientos del pasáu.

La escena final ye futurista y asocede mientres una escursión de xubilaos al Centru Niemeyer nel añu 2061, y inclúi l'apaición n'escena de la mesma Santina.