El Trabajo como retratista de José Cuevas

El Muséu del Pueblu d’Asturies espón una amuesa del trabayu como retratista de José Cuevas (Uviéu, 1844-Madrid, h. 1929), que foi'l meyor y más prolíficu dibuxante asturianu del sieglu XIX.


Espónense cinco semeyes de bustu: un dibuxu orixinal y cuatro grabaos publicaos en distintes revistes y llibros, que pertenecen toos a la colección del Muséu del Pueblu d'Asturies. El primeru ye una semeya de Clementina Martínez de la Granda fechu a llápiz sobro papel (64 x 50 cm), que caltien el so marcu orixinal; data d'escontra 1880 y tien un acusáu realismu. Tocantes a los grabaos, amuésense una semeya del políticu y escritor asturianu Pedro José Pidal (1799-1865), otru del músicu Antonio Baldelli (1850-1922) y otros dos d'una 'neña de la clase del pueblu' de 1879. El dibuxu de los dos primeros grabaos ta fechu a partir de fotografíes y el de los dos últimos ta tomáu al natural n'Uviéu.


Les obres espuestes son bien significatives de la calidá d'esti dibuxante que se treslladó escontra 1865 a Madrid y onde trabayó pa delles de les más importantes revistes ilustraes d'aquel momentu (La Ilustración Gallega y Asturiana, La Ilustración Española y Americana, El Mundo de los Niños, La Nación, La Lidia, etc.), na que se publicaron grabaos de los sos dibuxos de paisaxes, costumes, tipos populares, vistes urbanes, monumentos y tamién munches semeyes.